張繼聰 蝦頭 廚房偷情

鄭丹瑞(旦哥)自導自演的港產賀歲片《小男人週記3之吾家有喜》在年廿九上映，旦哥和索爆女友周秀娜及鄧月平(Larine)的戲份值得期待之餘，飾演賤佬的張繼聰，在戲中亦有驚喜演出，特別是與蝦頭楊詩敏的狂野調情。
電影公司昨日在官方Facebook 發布《小3》啜核片段，片內講述Larine和BabyJohn(蔡瀚億)撻著，Larine更獻出銀幕初吻。張繼聰又帶蝦頭去餐廳廚房調情，大講有味笑話，而這場戲是《小3》煞科戲，阿聰直言拍時有壓力，「因為導演對呢幕戲有期待，但我拍得好開心、好好玩，我同蝦頭係演藝學院師姐弟，但無合作過，拍電影係第一次，大家試戲有忍唔住笑，但拍時係一個鏡頭落，所以冇乜特別NG。」
拍戲有火花
蝦頭就笑說：「我哋戲入面係互相挑逗，同對方交流，喺廚房幫佢搽油，排戲過程都忍唔住笑，又成手油，加好多小玩意一齊玩，係特別開心同有火花，一拍即合。」不過她表示鍾意邵子風多過張繼聰，「但我都鍾意張繼聰老婆，我係阿Kay (謝安琪)粉絲，佢兩公婆我都好鍾意，佢哋好sweet！」