名人：女友未過四太關！猷君拍拖似偷情

【on.cc東網專訊】 賭王四房公子何猷君向來除了讀書叻，戀事亦相當精彩！女友多多的他不久前爆出戀上少女標本成員袁紫僑（CoCo），兩人經常sweet爆地於社交網放閃。雖然猷君愛得投入，不過新女友似乎仲未過四太梁安琪嗰關，早前四太被問到想唔想猷君和CoCo結婚時，她直言：「咁快？猷君依家仲創緊業，結婚嘅嘢慢慢嚟。」未過四太關，猷君拍拖不得不低調處理。

發現記者即撇CoCo

日前猷君相約CoCo打邊爐，更愛屋及烏約埋女友的姊妹何佩瑜（Jeana）、Annie G.等，一行人玩至凌晨2點半始埋單。行頭的猷君步出時發現記者，即大為驚訝，立即轉身通告各人，然後獨自上車走人。被撇下的CoCo與Jeana、Annie等不知所措，及至Jeana和Annie亦有車接走，剩下CoCo一個人呆企門口。

未幾暗角跳上同一車

未幾，猷君的司機終於駕着空車折返，CoCo獨自登車。當座駕駛至附近街頭，以為撇甩記者的猷君和數名友人忽然由暗角衝出來，鬼崇地跳上車齊齊走人，拍拖拍得相當小心。